الشرطة في خدمة الشعب..والشعب عم ينفعس

طالعين أنا وروان بامان الله من هلمدرسة …
مرّينا من جمب رصيف ..لئينا بنوتة صغيرة بالابتدائي عم تبكي ..وتبكي
فورا تذكرت يوم اللي ضعت أنا بالجبل …
كانت عم تبكي متل كانو حدا محاول يئتلها مسلن او هيك شي …
قربنا لحدها :
سألتها : شبك ,,ليش عم تبكي ؟

فردّت وهيي عم تسحب نفسها غصب من كتر البكا …:
– ممم …ممما ..مـ….مـ…ما عم ائدر ائطع الشارع …:(( وتابعت البكااااء بصوت عالي

لفت نظري شرطيين واقفين لفوق شوي ..يعني قريبين منها
عم بسولفو مع بعض ويضحكو …

كان نفسي اهجم عليهن …وصرّخ فيهن

بدك تعرف شو صار؟

المهم مسكنا هلبنت بأمان ..وقطعناها الشارع … مو نحنا كنا نساعد الأعمى لتقطع الشارع ؟؟
هيي وماسكة بإيدي ..كانت عم ترجف من الخوف
ولما وصلنا للجهة التانية ..وصلت ضحكتها لورا أدنيها …
– اي لوين بدك تروحي هلأ …بدك وصلك لبيتك ؟؟
– لاء …أنا بروح من هنيك …شكراً خالتو ..
– !!!!!!!!!!!!!!!!!!!!!!!!!!!!!!!!!!!!!!!!! خالتو !! خالتو اللي تاخدك
بس لولا انك صغيورة …كنت بدي اضربك ..يا عمري انتي

سلمت عليها وقلتلها تاني مرة قولي لعمو الشرطي في خدمة الشعب يساعدك …

تابعنا مشينا انا وروان …
روان : يا الله ما ألزّ الشغلات اللي بيبكو مشانها الولاد ..
– اي والله …نيّالن

انو يعني الشارع بدون شي عم بكون عجئة كتير …
وبمجرد طلوع بنات الثانوية من المدرسة …
بتلاقي ما لا يقل عن 10 مواتير ..و25 سيّارة …هاد غير السيارات اللي بتكون ماشية بطريقها عادي ..

يعني بتفكر انو يوم القيامة قام …
صوت الأغاني اللي طالع من السيارات ..والزمامير
ونحنا 3 مدارس جمب بعض …هاد غير شباب الثانوية اللي طريقهن من جمب مدرستنا
يعني اكتر من ألفين طالب وطالبة ماشيين بالطريق …
اي فهمنا بقى
وبحطولك بكل شارع شرطيين …لو حاطين ديوك بدالهن كان أشرفلنا
عم يسولفو مع بعض ..والولاد الصغار يا دوب عم يئدرو يئطعو الشارع
بكونو متل السنافر شي 4 او 5 ماسكين بايدين بعض وعم يدورو بأرضن مو عرفانين شو يعملو ..

يعني عنجد نحنا ويادوب بنعرف نمشي ..وياما وياما مكسورة مرايات السيارات الجانبية بكتافنا …
وبالسنوات الماضية صار اكتر من حادث دعس وفعس لكم طالبة …
بالسنة الماضية …كان ماشي تركتور بأمان الله من الطريق بس لانو في سيارات وعجئة ومواتير فات بالحيط
وفات برفيقتي كمان …وطلع فوق رجلها
ضلّينا ساعتين نركود بالشارع لحتى قنعنا زلمي انو ياخدها بسارتو علمشفى وقنعنا كم بنت يروحو معها ..
غابت البنت عن المدرسة مدري كم شهر بسبب الحادثة …
والشرطة وين كانو ..عم بخيّلو علميتور الابيض تبعن …ويشوفو بنات
ووقت الحادثة ..اكتر من 4 سيارات شرطة اجو وراح شوفير التركتور الكبير فيها..!!

يعني دايما بالكتب كنا نشوف صورة شرطي عم بيساعد الطالب يقطع الشارع بكل محبة ومودّة
حتى انو احيانا الطلاب يعطوه ملبسة لانو بحبوه …
يعني متل الشرطي اللي بمدينتي اللي اسمو | أبو أحمد | …حتى الكبير بساعدو بقطع الشارع …

إيييييييييييه …اللي بعيش كتير بشوف كتير

اي وهلأ شو ؟؟
شو لساتكن عم تعملوا هون ؟؟

اي ولله خلصت .. هي هيي التدوينة
ماتهزوا براسكن كتير او تستغربو .. هيي قصة قديمة
وقلنا بنكسب فيها ثواب وبنخلي حدا يزور هلمدونة المسكينة

هبووش

Advertisements

2 Responses to “الشرطة في خدمة الشعب..والشعب عم ينفعس”

  1. shanfara

    بس حتى ما نظلم كل الشرطة
    لسا في كثير من الشرطة حبابين، و لي مواقف معاهم كثير طيبة، يمكن لأنو ماعندي سيارة، فكلهم بيحبوني مثل مابحبهم، مرة كنت عم انتظر على الاشارة قرب مني شرطي و ضيفني سكرّة، و مرة بالمرجة معي اهلي و حامل غراض كتير و بدي عبي كاسة مي من الترمسة، ركض شرطي و عبالياها بإيدوا، و نفس الحالة بدي قطع الشارع، قام وقف السير كلوا منشاني و منشان أهلي يلي معي.و مواقف أكثر صارت معي.

    **أول مرة بكتب بالعامي 😛 **

    • هبشــة^_^

      اي مو كل الاصابيع متل بعضن
      في عنا الشرطي – أبو أحمد –
      بتمطر ابتساماتو ع كل صاحب سيارة واقف علإشارة .. بس لازم تضب كم قرش بجيبتو

      وكمان بيقطّع الصبايا الشارع كل ما شافهن
      وبيمسك بإيد الولاد وبيلعب هوي وياهن وبعدها بيقطعهن الشارع

      الشغلة بالنهاية بترجع لضمير الزلمي

      — وانا مو أول مرة بكتب بالعامي P: —

      نوّرت المدونة .. شنفرى زمانك ؛)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s