بطفولتنا نفديك .. أيها القائد

كنت طالعة مع رفيئتي بعد الامتحان ..
لنعمل هي الجولة المعتادة تبعنا
نتفقد أحوال الرعيّة واخبار البلد الاندساسية وغيرو وغيراتو ..
وعم نمشي ونمشي ونشبع هوانا كلام وكلام .. ولعي ما بيخلص إلا لنخلص نحنا
أي .. لأنو نحنا بنات !!

لمحت عيني من بعيد … صف من الأقزام طوييل
فوراً أرّبنا لنشوف شو في .

حسّيت حالي أكلت كف ع نص خلئتي !!
وفوراً عصّبت ..
ورفيئتي تقلي روقي ونوّصي صوتك ما يسمعوك ِ ..

متل العادة ..
جولة استحمارية للانضمام إلى صفوف القائد في محاربةالمؤامرة اللي عم تنحاك
علينا من جميع الأماكن والبلاد ومن كل العباد .. المؤامرة الكونية ..

كان في لبوتين من اللبوات الأسدية متل ما بيسمو حالهن
من لما كانو يشخبرو فوق العبارات الاندساسي اللي ع حيطان البلد ..

وطبعاً هاللبوتين .. لبوتين عن جد
من شكلهن بيّنو انهن مؤيدين وشبيحة رسمي ..

أنا اللي عصبني ..
اني ما كنت شوف الولاد اللي ما بيتجاوزو ال6 سنين
غير انهن دماغ ..
عقل ورا عقل ..
قلب ورا قلب
براءة .. طفولة

ورايحين يقتلوها من هلأ .. رايحين يدمّروها
ويعطوها فدى للقائد ..

ومنظر الناس اللي بالشارع ..
اللي مو فهمانة شي من شي
وبس شايفة ولاد صغار حلوين عاملين صف طويل ..
واللبوتين عم ينظموهن ..
والناس تبتسم ..: انو شوفو هلولاد ما أحلاهن !! دخيييييل ألبكن !!

انا بس حسيت حالي بدي جن .. وقفت وصفنت وجئرت عيوني باللبوتين
حسيت حالي بدي العن روح روحو للكر اللي خلف الكرّ الحالي ..
وخلّا هلكم بطيخة يقتلو العقول ..

ما قدرت احكي ,, لانو كان معهن شبّيح من أبناء البلد .
ومحسوبتكن بكفيها كلااام ..

أرّبت من جمب ولد ..
ولك شو بدي قلو !!
شو بدي قول .. هاد شلون بدو يفهم اللي بدي احكيه ..
!!

حملت حالي وبعّدت عنهن لانو شوي وبدي افجر

وئعدنا نراقب من بعيد

أخدو الولاد بعد ما اصطفوا لعند عمو الحلاق ..
مابعرف ليش !!
يمكن مشان يعطرهن وتكون ريحتهن حلوة هنن وعم يمارسو الطقوس العبوديّة

وحملوا حالن ومشيوا بهالشارع .. مابعرف ايمتا بلشوا هتاف
او وين كانو رايحين يهتفوا ..

بس اللي بعرفو انو راحو يحيّو القائد
ويهتفولو .. ويفدوه بأرواحهن هنن وكم لبوة

راحو يهتفو لنفس القائد اللي صورتو محطوطة فوق اللوح بقاعة امتحاني ..
واللي بتشوّشلي افكاري
وبتفوّتني بعشر طعشر حيط

وبالروح بالدم نفديك يا قائد
الله سوريا قائدنا وبس
نحنا رجالك يا قائدنا .. نحنا ولادك يا قائدنا

بس مو ذنبهن ..
مالن عرفانين انو جلالة وفخامة الملعون ابوه مو مطوّل ..
مو عرفانين انو باقي عليه أيام .. وبنئحّطلو

اما حسابنا بعد الثورة مع هلكم لبوة وشبل ..
هدول إلهن الحساب العسير ,,
وبدي دوّر عليهن دوارة بعد الثورة
بس بدي شوف عيونهن شو بدها تقول
لما رح يروح القائد تبعن
مسند ضهرن ..
واللي طالعهن علقمر .. وعززهن وكرّمهن

ملعونة روحو لحافظ ..
اللي من اكبر منجزاتو .. انو خلّفلنا هالجحش الأهبل

حملنا حالنا ..
وتابعنا جولتنا
ونحنا وماشيين اللي خلاني انسى الموضوع
كم عبارة اندساسية .. مشخبر عليهن من قبل اللبوات ومحطوط شعار
اللبوات الأسدية SN
ولله لولا هلكم مندس اللي بلبد .. لكنت  طئيت من زمان
ويلعن روحك يا حافظ

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s